صاحب الضويري
انه ذاك الباعك وما رد شراك *** وسلمك بيد الزمن واسننينه
انه عزرايين لو رادك لكاك *** ومنهو ضمن روحه اعله عزرايينه
انه كارط ملحتك عارف هواك *** انه عارف هرشك ابيا طينه
انه دمعي واللبن والليل ذاك *** تالي حسوة ماي ما تطينه
يوم جانت طافحه بميها سماك *** واحنه مات من العطش جالينه
يالشتلتك جابني الضيم الذراك *** لن شجركم ما يفي اعلينه
محنه زودك يا الف سوده بكراك *** يلحلال ابطنك السجينه
***
يا سواجينه السرت بارض خراب *** وايماي التيهت ادروبه
جالسنين اتلاهت بريع الشباب *** رمله والرمله فلا مرغوبه
يا زمان وطبع الك شبه الغراب *** وبالحياليه البسمه مصلوبه
واحنه وادم ما كللك اركاك *** لاجن الطيب اليغلب اعلينه
طير ولي ومن يخم جنحك سماك *** هم تطيح بكاعنه وجالينه
***
اي يمسعد تضحك ابكل السنون *** ومن زمان احنه الضحك ناسينه
ومن زمان امشجل وابره الضعون *** واليكع ماليه مهجه اتعينه
يا عيوني الما جرت مثلج اعيون *** ويا جفن يركه الدمع صوبينه
خاف غصن الشوك ينهيه الهلاك *** احنه منحر للهوه امخلينه
اذكر الله وحوبة الوادم وراك *** المحمي لا بد ما تزل جدمينه
***
شواشوفك ما تحن وانته الحنين *** يصير كلبك من صبخ حنيته
عمي بطل لا تسولف للسنين *** وانه حبل امواصلك جريته
يالتعمر البيت لا تبني عله لطين *** والتعمد ما يعمر بيته
ولا تدور الطيب واللايم جزاك *** ظل يدور طيبكم جاوينه
من اشتهيتك يوم ولساني لكاك *** بغير ملحه اورودكم للزينه
عاد باعاك ضامري وما رد شراك *** وسلمك ليد الزمن واسنينه
